الصورة والبرواز
هنا في مملكة صمت الشعور ودمعة الأحزان
هنا يا سالفة عمرالمكان وضيه وانواره
هنا شفتك مثل حلمٍ كأنك من ملوك الجان
تمرّي داخل انفاس الغرام وتسكني شْعوره
قريتك من نظر عينيك وقلبك ما بعد لي بان
واحسّك من نظر عينك شقيّه وبنت مغروره
شعوري ما خدعني لا .. ولا اظني بعد غلطان
أجل وشلون لا شفتك وتهت بْعالم الصورة ؟!
يا خوفي ينكسر داخل غرامي كبرياء انسان
واموت من الوله واوقف على أطراف تنوره
دخيلك خففي عني جحود الحب والعصيان
دخليلك لا تخليني مثل من ينتهي دوره
كفايه اني من عنادك شربت الذل والحرمان
واحس اني وسط قلبك .. وانا في أرض مهجوره
كأني ما خلقت الاّ ألمم باقي اللي كان
وانا قلبي مع قلبك جروحه تلغي حْضوره
ألا يا ساكنه بين الضلوع وروعة القيفان
دخيلك كفّني قلبي بنبض الشعر وبحوره
وعودي بي إلى صمت الشعور بْداخل الجدران
ما دام الصمت ما يقبل يضم ابيات مسكوره
تعالي جرّبي حضني وهدّي ثورة النسيان
تعالي لعن أبو جد الغياب وقسوة غروره
علامك شايفه روحك .. على بالك أنا خسران ؟
أنا ديره من احلامك وبالأشواق معموره
أنا كلي وطن روحك .. ونبضك داخلي أوطان
وجرحي داخلك ينزف ولا حصّلت دكتوره
تعبت أضمّد جْروح المكان ودمعة الوجدان
تعبت اكذب على نفسي واقول البنت معذوره
نسيت اني مجرد شخص .. لملم داخلك أحزان
نسيت انك مثل ظلك .. وبالأعذار مشهوره
نهاية مؤلمه صارت تعيش بْعالم النسيان
وصارت تحتضن قلبي مثل برواز للصوره


شعر : فيصل المريسي