في مساء يوم حافل بالبطولات في احدى ليالي الصيف الممشقه وعايش جو الواصل
ومعيش نفسي عيشة ملوك وانا على الكرسيدا حقتي ( 87 عنابي GLX ) ويا أرض أنهدي ماحدا قدي
طبعاً اعوض النقص اللي فيني بأحلام اليقظة
وادور على مربع شارع الثلاثين وأتذكر الايام الخوالي وكلي غرور وفُحش ؟! كأني راكب بنتلي !! ومشغل علي بن محمد ( ياراكب الكدلك ابو زايد اشرلك ) ! وعايش الجو المخملي واسمع اهازيج في خيالي المخيس تغني وتقول " يايمين الخير يايمنى سعد " !!
وقفت البنتلي حقتي اللي لوحتها ( س ع د 1 1 0 ) <<يحاول يقنعكم انها صدق !!
ونزلت لبنده بشتري كرز مالبورو احمر << تراني ما اشتري الا بالكرز عشان اوفر 4 ريال ؟! حقت اثنين بايسُن ؟! ... دخلت وشريت دخاني واثنين بايسُن ورحت بحاسب
وانا واقف عند الكاشير وماسك الكرز بيدي اليمين وجوالي النورس بيدي اليسار طبعاً شكلي وقتها لو يشوفني الكافر أسلم !!
لابس ثوب اصفر كأني زالق بزبده ووصخ ونخروري متعلق في طرف خشمي ,, وريحتي دخان على صنان على بندول يعني بمامعناه كأني طالع من عزبة هنود شغالين بمحل مفروشات في بن دايل ؟! وتقدر تقول وصخ بكل ماتعنيه كلمة وصخ من معاني مفهومه ومبهمه !!
كان فيه وحده قدامي على الكاشير وماسكة سرا هي اللي خلتني اتذكر البنتلي على هالمقفى !! من قو الحموضه والقطعه قاعد اناظر وانا فاق خشتي والنخارير تخالطة مع السعابيل ؟!
لابسة عباية عليها شعار القراصنه هذاك اللي محطوط على محولات الكهرب ومكتوب عليها خطر !! وريحتها معسل عنب توت يوم مشت قدامي بتحاسب وانا اسمع اصوات الخرفشه من هالسلاسل والغوايش كأنها دنة باكستاني من الزبرقه اللي فيها ؟! ناقصها عقود لمبات وأربع زوالي تأجير أم ريالين وتصير ساحة محاورة من شيّن فيها ياكافي
حاسبت عن المخزي اللي معي وركبت سيارتي توني مدّخل المفتاح بالستويتش بشغل الموتر الا هاليد اللي لونها سودا وتحس انها انواع الوسوم بقطف دخان والروثمان حالف انه يلمس اطراف اصابعها بكل زقاره ؟!
رفعت راسي واشوف من هاللي راكب في موتري ؟!
رفعت درجة من حد الفخوذ وتحت شفت عباية تشبه العبايه اللي شفتها عن الكاشير قلت في بالي لهاالدرجة انا اخقق ؟!
رفعت حد الصدر شفت علامة القراصنه حقت الخطر وتأكدة اني انا فعلا اخقق وشكل هالبنت من النوع اللي يحب الناس الوصخين على قولتهم " ديرتي " ويجدلون اباطهم !
رفعت على الوجه شفت خشة حصة الشهبا وهي فاقتن خشتها تناظرني بكل دلاخه ؟!
وتصكني ببقس وقالت : هيييي يامااان مذااا فيشش ؟! وسااااب
وينك انت ياحقير ليه ماعاد تنشاف ؟!
انا : هووو ؟؟ حصه ؟ ورا شكلتس كذا ؟!
حصة : وشرايك باللوك الجديد بس امي تقول اني خربت من عقب مادخلت معهد نيوهورايزن ؟!
انا : الله يالدنيا ياحصه وبعدين وش هاللي انتي لابسه ووش هالجماجم اللي معلقتها تشتغلين حفارة قبور ؟ حتى اسنانك عليها جماجم ؟!
حصة : وش عرفك انت باللزلز انا خلاص صرت مسترجله شف شف قاصه شعري بوي صرت داشره مثلك ؟! واللبس سروال طويل زي حق العيال واللبس صروال اوميقا بعد وصرت اعرف اعزف قيتاره وعود واروس وصديقي حسن بلونه
انا : افاااا هذي اخرتها ياحصه طلعتي لزلز ؟!
حصه : اقول لايكثر بس انا خلاص بسحب عليك السيفون صرت احب وحده سوريه طخما تدرس معي بالمعهد اسمها " سُنيهه " ؟
انا : " كف يمشي مليون " مابقا الا المبزره بعد بتعقلين انتي ولا اطى في بطنك ؟
حصة : ياخي مالي دخل انا شفت البنات بالمعهد يسوون كذا سويت مثلهم ؟!
رجفتها ونزلتها من السياره وقلت لانتي حصه ولا انا اعرفك دام هذي حركاتك .. ومشيت في طريقي ومازلت عايش الدور الملكي خصوصاٌ
اني توني كارش بنت حسيت اني سادي ومعي صوط وقاعد اللسبها
" طرّاه احب العسف المهره الداشره "
جاني اتصال من أحد الزملاء بالعمل بلغني فيه انها انهية خدماتي بسبب عدم تكافل النسب ؟
عطيت نفسي زوم مع المرايه كذا ومشغل " يازمان الذل زل " واضرب بيدي الدركسون يوم تهلهل وطاح صرت امسك الدركسون بالبوري ؟!
يلعن امها حالة وش اسوي الحين كملت دوراني واشوف ذيك الـ 460 مارة من جنبي وراكبه فيها حصه وتأشر بيدها عافطه كل اصابعها عدا الوسطى وتقول هذالك ياسعد ؟!
رجعت لبيتنا ولقيت امي غزيّل جالسه بالصاله وماسكه الرادو في يدها وملزقته باذنها وتتحسس رجيلاتها ...
انسحبت بنفسي بعد السلام عليها ورقيت لغرفتي فتحت باب غرفتي سكرت باب غرفتي انسدحت على سريري تلحفت بلحافي غمضت عيوني حلمت حلمي قمت من نومي دخلت حمامي غسلت وجهي وشلت غمصي نزلت لامي لقيتها لين الحين جالسه بالصاله وحاطه اذنها على الرادو ؟!
قلت يمه سلامات من امس وانتي حاطه الرادو على اذنك وش السالفه
قالت الله لايبارك فيك انت ومواضيعك ماتدري اني عجوز يالله اتحرك وراك مانومتني وقفلت الموضوع ؟!
قلت خلاص روحي نامي يا اميمتي شكلتس تعيبانه وانا بطلع لمشوار ومدري متى برجع
شدتني مع يديّتي وقالت " وين ساير ياعين أبوي " ؟!
قلت : ماعاد لي مقعاد من هالديار ,, والديار ماتاسع اثنين ,, ارجاتش بالله ومحمد رسول الله
قاطعتني امي هنا وسطرتني بكف حلاقه وقالت فارق بس انت وجهك صدق انك ماتنعطى وجه يابزر
ركبت موتري واحس اني ضايع ومالي والي ,, مفصول من وضيفتي واخوياي سحبو علي وحصه صارت مسترجله وسحبت علي وصارت حقة مواتر وتقول " أوووه بيبي " بشراهه ؟!
وبديت احس اني عاله على المجتمع خلاااص ضاقت فيني الوسيعه وش اسوي وقفت موتري على كبري السويدي وطلعت ملف من فوق الشمسيه وفيه اوراقي وشهاداتي طلعة صورة من شهادة الجامعه وكتبت على مقفاها وصيتي
طلعت واير سحب من الشنطه ولفيته ثلاث عقد على رقبتي وركضت من الرصيف ناصي الكبري
واشبك الواير بماصورة الكبري واطب بكل ما اوتيت من قوة من فوق ؟!
احس ان الطبه طولة انتظر الواير يدقر لرقبتي بس ماش كل شوي احس اني قربت من هالشجرة اللي تحتي وش السالفه ؟!
ماوعيت الا وانا خامن الشجرة اللي تحتي وماصورة الكبري من طيب اصلها ماتحملت الوزن الزايد انكسرت وطاحت على يدي ,, جوني اربعة مبزرة على كامري صوت صريخ كفراتهم يسمعة الاصقه
ومن الشفاحة صدمو العمود بعد وبنط على جبهتي وشق حاجبي وطلعت مثل رامي عياش ؟!
كلهم بحركة واحدة طلعو جوالاتهم N73 وقامو يصوروني وانا اون وحالتي حاله والدمامين تصبصب
واحد يقول لاأله الا الله هذا يا اخوان حيوان غريب طالع من ديراب ؟!
والثاني وهو يصور يعلق ويقول هذي اخرة المخدرات والمسكرات ياشباب توبو إلى الله ؟!
والثالث جالس يفتش مخابيي ويقول دمرتو البلد يا ارهابيين ؟!
والرابع قاعد يدفدف خلق الله ويقول هذا ولد خالتي وخرو عنه ؟!
دريت اني طحت في جحلط منتهين حالهم من حال شعبنا المنتهي ؟!
عقب كل هالمعمعه ليتني استفدت شي ولا فطست
الا انسرقت سيارتي وانا ومحاولة الانتحار حقتي الفاشله ؟ و غرموني 15 الف حق الشجرة والماصوره ,, و 5 الاف حقت تعطيل السير وازعاج السلطات ؟!
بعد هذا كله ايقنت وانا بكامل قواي العقليه ان مالي جلسه بهالديره خلاص لازم اهاجر
حطيت ابوظبي بين عيوني وقلت ياسعد رزقك هناك راس مالها اصير اصك حدا شيوخهم بقصيده واطلع مليونير ؟!
توجهت شرق وحاط بين عيوني معلومة مأكده من خيالي الوصخ ؟!
على بنت شيوخ واسمها " موزه " وبعيش عيشة هارون الرشيد ؟!
بس للأسف وصلت منفذ البطحاء ومسكوني حقين الجمارك عشان معي لابتوب فيه صور وافلام كرتون
ولحطوني بالحايره حقهم وحكمو على بالسجن 3 سنوات مع الاشغال الشاقه
وتعرفت على حرامي في السجن وقالي انه موزي كنز في عجمان ويقول اذا طلعنا من السجن بنروح انا وياه ونتقاسم الكنز ,, لأني معشمة بفلم رقصد حق الوليد يبي يشوفه بس ماعنده فديو صغير ؟!
ماتلاحظون اني من نومت امي ماعاد قومتها ؟! خلاص يالله مع السلامه بروح اقوم امي وادهن رجيلاتها
The End
* ليس الفتى من قال هذا ابي
* المسترجلات كسرو سوقنا ياقدعان
* محد يخبرلي وظيفة لو على بند الفزعه ؟
* محد عنده فلم الرقص حق الوليد ؟
منقول لـ (سعد القوي )*
هذه الرسالة تفيد بأنك غير مشترك في صدى الاهات. لتسجيل الرجاء اضغط هنـا 
الإهداءات
آخر ابداعات سعد القوي ( قصة جميلة تدل على كاتب جيد ) 
العرض العادي
