الى كل حلوه ناشبة (ن) في حلق أهلها وماتصرفت مع انهم حاطين معها أختها مجانا ( لترويج البضاعة الملحطه في البيت ) اليك عصارة راسي وبنات أفكاري أضعها بين يديك كيف تصطادين تمساح دون اللجوء للأساليب المعهودة والسقيمة ( المغازل ، الترقيم ، التميلح اللي ماله سنع ، الترزز بالاسواق , الخ )
للاجابة على هذا السؤال اليك مايلي :-
أهم نقطة :انشبي على العجوز اللي حاطة(ن) عينك على ولدها ثم نفذي مايلي :-
1-خليك مع أمك لاتروحين مع البنات وتهيبلين اركدي عن الهباله واصبري عنهن كم شهر لين تتم العملية
2-امشي وانتي حاطة(ن) راسك بين كتوفك لاترفعينه أبدا حتى لو يصير كله صعارير (خلي الفكس دائما في متناول اليد ) علشان يقولون مؤدبة وماهي متكبرة
3-كلمة خالة خليها على لسانك وخاصة(ن) لأم التمساح علشان تحس بنوع من التميز عن بقية العجز .لامانع تنادين وحدة ثانية بخالة علشان إذا مانجحت الخطة مع العجوز نمبر ون تنجح مع الثانية اتبعيها كخطة احتياطية (يعني ستبنة )
4-إذا بدت أمك تتكلم انغزيها بكوعك علشان تدخلك بالموضوع حتى لو مالك داعي تطبيقا للمثل (كثر الطق يكسر الحديد) أدري إن المثل ماله داعي بس مالقيت غيره
5-اخوانك الصغار لاحقيهم وطامري وراهم وين مايروحون حتى لو ماهي عادتك بس تصرفي معهم كأنك أمهم لأن هذا يوحي بما لايدعو مجال للشك عند العجوز بأنك حريصة على ذريتك
6-مهما أكلت أمك من أكلة زينة خليها تقول نفس الاكله اللي تسويها بنتي (حتى لو الاكل من المطعم الصيني أو المكسيكي )
7-اذا جيتي بتمدين ايدك جعلها الكسر<<<<<خربتها اعبطي خشتك وتويجعي (مو قوة علشان مايقولون ماتصلح) وخلي أمك تقول :قايلة (ن) لك وأنا أمك لاتنظفين جدران الفلة الخارجية بس أنتي الله يهديك ذابحتك النظافة <<تقول (جعلي ماأبكيك أجل بتنظفين جدران الفلة نظفي غرفتك أول اللي تقولين ثايرة فيها قنبلة ذرية )
8-دايم ارتزي كأنك بالعة(ن) زرافه علشان ماينقص من طولك ولا سنتيمتر (للقصيرات)
9-اذا تكلموا الحريم عن أي عرس اكتمي نفسك لين تحمر خدودك علشان يقولون البنت تستحي ومالنا حق تكلمنا عندها (بس لاتكتمين نفسك مرة أخاف تروحين فيها وأصير قتلت نفس بغير حق )
10-مهما كان موضوع الحوار حماسي لاتبدين رأيك وخليك مثل الطرمان لأن اللقافة تجيب أجل الخطة
11-شعرك افرديه لين يتحسحس لاتخلينه طاير وشوشة مهما كانت الموضة لأن العجز مايدورون الا اللي شعورهن ناعمة والا اللي شوشهن طايره ماحد يلتفت يمهن
12-إذا أدلت العجوز (أم المتوهق) بأي رأي سواء كان سياسي أو وطني أو اقتصادي وافقي عليه حتى لو هو ماسخ وماله داعي مثلا تقول العجوز أمس بوش متقهوي عندنا قولي لها :وليه ماعلمتينا ياخاله نجي نعاونكم
14-اذا جا طاري السوق وطبعا هو لازم يجي الطاري لأنه ملح الجلسة عند الحريم خلي أمك ( الله يعظم أجر أميمتك بناتي مايطلعون للسوق أغراضهم أبوهن يجيبها ( وانتي شكلك مقطعه السوق تقطيع ) احتمال وارد الحدوث
ممكن تكون العجوز منشنة على بنت غيرك لكن بعد النقاط السابق ذكرها بتصرف نظر عنك وعنها <<< أمزح لاتصدقين الحين بتكون العجوز وقعت باالفخ
نرووووووووح للتمساح الحين
اهجدي في بيت أهلك ولاعاد تطلعين واذا جاء المعرس بيشوفك خلي أبوك يقول له والله ودي تشوف البنت بدون ماتدري علشان تأخذ راحتك وانا عمك وبعدين تشوفها على الطبيعة علشان ماتقول بعدين غشيتوني (ايه هين ياالشايب لو يحصل حطيت بدالها باسكال مشعلاني والا أليسا والا مايا هالي مطيراتن عقول الشباب ) وقبل يجي اليوم اللي بيشوفك فيه بحوالي اسبوع أو أكثر (على حسب شين وجهك )ادهري من مشغل لمشغل (صبغه ،فرد، تنظيف بشره،الخ) لاتخلين على روحك قاصر ولما يجي المعرس خلي أخوك ياقف بجنبه عند الشباك علشان مايطوول بالتبحلق ويبان المستخبي وذلك تطبيق(ن) لنظرية (اللمحة ذبحة ) بعدها عاد كيف بيشوفك هذي عليك مو كل شيء بعلمك اياه دبري عمرك بس خلي أبوك في نهاية المشاهدة يقول العذر والسموحه وأنا عمك (الأخ ضمن الولد يوم انه يقول وأنا عمك ) ترى البنت حوسة (مع انك طاقة (ن) كل زينك بس يعني يعني ) في هاللحظة الولد بينط على راس أبوك وبيمطخه بوس لين يشفط مخه وبيقول متى العرس ياعم (اللهم ارحمه فقد كان ولدا بار (ن) بوالديه )
عاد الله يوفقك ولاتنسينا من حلاو العرس واياني واياك تعلمين الولد من اللي معلمك هالعلوم ولا حتى باسم المنتدى لأني أعتقد انه بيسوى مصيبه وأخاف يحط حرته فيني .
تحذير
ابعدي عن أمهات العيال اللي متعلمات راعيات الشنطة مثل لون الجزمة لأن هذولي يبيلهم خطط بعيدة المدى .
نصيحه
رفيقاتك بيلاحظون التغيرات المفاجئة اللي صارت لك فانتي قولي لهم انك خلاص انسانه عرفتي درب السنع والعداله
تدرين ليه؟؟
خوفا من سرقة الفكرة الادبية .
ههههههههههههههههههههههههههه
عشق الليل تكفى بليييييييييز علمني خطط امهات العيال المتعلمات راعيات الشنظه مثل لون الجزمه والشعر
لاني حاطه عيني على ولدها من زمان وهو مسكييييييييين ميييييييييييت فيني لكنه عجز يقنعها مالومها تغاااارمني
انافسها الشنطه زي لون الجزمه
ههههههههههههههههههه
هذه الرسالة تفيد بأنك غير مشترك في صدى الاهات. لتسجيل الرجاء اضغط هنـا 
الإهداءات
موووضوووع اسبشلي حق السحالي بس 
